بطل اليُورو 2024

 

بعد المجموعات ، من هو بطل اليُورو 2024 هل هو  ألمانيا صاحبة الأرض أم فرنسا أقوي اسكواد أم أسبانيا صاحبة أعلي أداء من وجهة نظري في دور المجموعات أم انجلترا و ضربات ساوثجيت لنفسه أم هي البرتغال  و ختام جميل للدُون  و لكن هل لروبيرتو مارتنيز رأي آخر أم هي إيطاليا التي لا  أحد يعلم  كيف تفُوز باليُورو لكنها تفُوز حتي في ظل ضعف الإسكواد مقارنة بالفرق الأخري   ، مقُولة منتشرة في اليُورو لا تأمن غدر الطليان بعد عبُور المجموعات  .

ألمانيا بقيادة توني كروس  العائد من الإعتزال الدولي و الماضي إلي الإعتزال النهائي بعد اليُورو و بإسكواد نوعا ما متوازن بقيادة كيميتش و هارفتز و مدرب مُخضرم  نيجلسمان  ، ألمانيا قطعا المرشح الأبرز لأنها صاحبة الأرض و حتي الآن في دور المجموعات لعبت ألمانيا ماتشات متوازنة جداً من الناحية الدفاعية و الهجومية لوهلة تشعر أنها لوحدها في الملعب لكنها أحيانا تقع في الهفوات الدفاعية القاتلة  ، أما  فرنسا و التي تعتبر أقوي إسكواد في أوروبا أو العالم ، ففرنسا تمتلك تشكيل أساسي و آخر احتياطي قادرين معاً الفوز باليُورو  امبابي و الرفاق ، لك أن تتخيل أن ميندي احتياطي في منتخب فرنسا و هو من  وجهة نظري أقوي باك شمال في العالم من الناحية الدفاعية ، فرنسا في دُور المجموعات لم تُقنِع و لكن سايرت الأمور  بقيادة النفاثة كانتي الذي يبدُو أنه قد استعاد شبابه من جديد " ما شاء الله "  الثغرة في فرنسا أحيانا الاعتماد علي جريزمان بصفة أساسية ، أري أن فرنسا لا تحتاج لجريزمان أو جيرُو في المباريات ، التشكيل الأقرب للواقع من وجهة  نظري 4/3/3 امبابي و باركُولا و ديمبيلي و مرونة في تغيير الأماكن   ، جريزمان الحالي ليس هو جريزمان كأس العالم الماضي أو قبل الماضي و لكن واضح عامل السن و كذلك  تشعر في بعض الأحيان غياب الشغف لديه دُون وجُود مبرر حقيقي لذلك  ، قطعاً فرنسا المرشح الأبرز من وجهة نظري  ، حتي الآن لم ينفجر أمبابي و كذلك لم يبرز كامافينجا و لم يتوهج عثمان ديمبلي لكنه فريق قادر علي الإنفجار في أي وقت ، أما أسبانيا فهي المرشح الأبرز من  حيث جودة اللعب ، إذا أردت المتعة شاهد أسبانيا ، أسبانيا أكتر فريق في دور المجموعات أثبت فحُولته الكروية  ، فريق قادر علي تسجيل خمس ست أهداف في المبارة بقيادة كارفخال و ناتشو و الثنائي ويلياز و لامين يامال ، أحيانا تشعر أن هذا الفريق قد وُلِد ليلعب كرة جميلة و لكن دون التتويج ببطُولة ، يُنسب ذلك إلي قلة الخبرة و النضج و لكني أري أن الفريق يمتلك خبرة كافية لترجيح كفته في المواقف الصعبة ناتشو و كارفخال خير مثال و كذلك خيسُوس نفاس ، موراتا أيضاً يمتلك  بعض من الخبرة و ينقصه نوعا ما في بعض المواقف التصرف الصحيح أمام المرمي ، لا أنسي أبداً موسِمه السئ مع تشلسي سقط مع الضغط و لكن قد يشفع له عامل سِنه الآن لكن أسبانيا علي مستوي عُمق التشكيل بعيدة كل البُعد عن الفرق المُرشحة  كذلك  الفريق لم يُعاني لإحراز الأهداف تشعر أن الفريق كان في نُزهة في دور المجموعات ، إذا استطاع المنتخب الأسباني  تحمل الضغط فإننا قد نري أسبانيا في النهائي  ، أما انجلترا فحدث و لا حرج ، انجلترا  قادرة علي الفوز باليُورو من غير مدرب و لكن بمدرب  فذلك يغدُو صعب أما لو كان المدرب ساوثجيت ف ابقي تعالي  قابلني  ، مدرب عقيم  ، الفريق يبدُو صغيراً أمام الفرق الصغيرة ، أما أمام الفرق الكبيرة فلا أظنه سيصل لملاقاة فريق كبير مرشح سيمُوتون قبل الوصول لليفل الوحش ، مدرب يمتلك أفضل لاعب في الدوري الإنجليزي + هداف الدوري الألماني  + أفضل لاعب في الدوري الأسباني " كُومبو يتمني أي مدرب في العالم أن يمتلك واحد منهم و لكنه يمتلك الثلاثي لكن حينما  تشاهد المنتخب الإنجليزي تشعر بالشفقة عليهم  ، مدرب قادر علي صنع فسيخ من الشربات ، قادر علي  تحويل الفراري إلي فيات 128  ، بعيداً عن الثلاثي السابق و لكن إذا شاهدت إسكواد انجلترا تجد أنه لا يقل جودة عن اسكواد منتخب فرنسا و لكن حينما تشاهد فرنسا تشعر أنه مرشح علي غير العادة أما حينما تشاهد انجلترا تشعر أنه مرشح للخرُوج كالعادة ، مدرب خسر النهائي علي أرضه لا يستحق نهائي آخر خصُوصاً أن الفريق لا شكل و لا لون و لا خطة فريق عاجز عن صناعة الفرص فريق عاجز عن لعب كرة القدم ، أما  البرتغال فلا تختلف كثيراً عن وضع انجلترا لكن الخبرة و وجود رُونالدو قد تعطي بعض الأفضلية  ، البرتغال  إسكواد جميل لكن تشعر أن الفريق لا يلعب كوحدة واحدة  و كذلك عدم وجود طريقة لعب واضحة ، الفريق يعاني برغم الجودة و الخبرة الذي يمتلكها فريق  يمتلك كل العناصر للفوز باليُورو باستثناء طبعا المدرب القادر علي  خلق طريقة لعب  ،  متعرفش الفريق بيلعب ازاي أو هو مميز في ايه ،  و لكن هنشوف ، متعرفش الاتحاد البرتغالي كان بيفكر في ايه لما قرر يعين رُوبيرتو مارتنيز ، مدرب أخفق في كل حاجة لكن يبدُو أنها سياسة كل الاتحادات المصري و الانجليزي و البرتغالي ،  اختيار أسوأ أختيار ممكن لقيادة المنتخب و كأنهم لا يريدُون الخير للمنتخب ، إيطاليا المنتخب الغريب العجيب الرهيب بعد هدف في دور المجموعات يضعها في  الصف السهل في دور ال 16 نوعا ما سويسرا برغم أداءها القوي في دور المجموعات و لكنها صيد  ليس بالمستحيل في مواجهة إيطاليا و لكن المعهود لإيطاليا أنها مرشحة في الأدوار الإقصائية حينما تواجه فريق أعلي  إسكواد منها و لكنها حينما تواجه فريق صغير أو غير مرشح فإنها تُعاني  و لكن تفُوز ،  يبدُو أن طريق إيطاليا مفرُوش بالوردو للفاينال

توقعات دور ال16 

أسبانيا ألمانيا

البرتغال فرنسا

هُولندا النمسا 

إنجلترا إيطاليا 

ــــــــــــــــــــــــــــــــــــــــــــــ

ألمانيا فرنسا 

هُولندا إيطاليا

ــــــــــــــــــــــــــــــــــــــــــ

فرنسا إيطاليا

________________

فرنسا

 

الدوري الإنجليزي موسم 2023/2024

 

 

 

 

 

 من يكُون بطل دوري موسم 2023/2024 ؟ لا أنا معرفش الغيب أنا بسأل زيي زيك  ، الموسم  هذا العام صعب التنبأ به ف السيتي مازال يحظي بقوته الضربة شبه كاملة مع تدعيمات تكاد تكون شاملة كافة نقط الضعف اللي أصلاً تكاد تكون مش موجودة أصلا عندهم ، أكاد أجزم أن دكة السيتي ممكن تحقق مركز مؤهل للأبطال من غير ما تتشنج  ، كالعادة يبقي السيتي هو المرشح الأبرز  ، ناهيك عن القوة الضاربة للفريق  ، إلا أن  جوارديولا قدر يعمل فريق  صاحب نفس طويل أوي في الدوري ، ممكن تلاقيه يقع ماتشين تلاتة في أول الدوري إلا أنك هتلاقيه هو اللي بينافس مع أقل فريق وقع في الماتشات الأولي ف السيتي عنده الميزة الأبرز صاحب أطول نفس في الدوري و إذا ركب الصدارة محدش هيعرف ينزله إلا بصعُوبة أوي و اسأله ليفربُول  ، لكن الموسم ده مختلف عن المواسم السابقة ، في فرق كتير قادرة تنافس السيتي أو ع الأقل تفرهده ، تفرك معاه لآخر الموسم عندك أرسنال اللي خسر الدوري الموسم اللي فات بسبب جزيئات بسيطة و قلة الخبرة و نوعا ما الدكة مكنتش بقوة منشيستر سيتي و تقدر تقُول برده مكنُوش مصدقين أنهم ممكن ياخدوا الدوري  ، هما نفسهم  تحس أنهم كانوا مستنين الفيل يقع من علي فرع الشجرة ، لكن المُوسم ده غير ، بقي في عُمق في التشكيل و اشتروا لاعيبة نوعا ما سُوبر و شبه داروا كل نُقط الضعف اللي كانت موجودة الموسم اللي فات بل كمان تقدر تقول أن الفريق بقي قادر يلعب في أكتر من بطُولة عمق في التشكيل + عناصر شبه ثابتة + جودة اترفعت  ف نقدر نقُول أن أرسنال هو  أول فريق  كمنطق يقدر ينافس السيتي علي البطُولة المُوسم ده ، تاني  محتار فيه بين نيوكاسل و اليونايتيد  بس هروح مع اليونايتد بما أنه فنِّش المُوسم اللي فات فوق نيوكاسل ، الموسم اللي فات  لليونايتد كُنت تقدر تقُول كان  لسه تين هاج بيستفتح و كمان كان فيه شوية مشاكل في الفريق من رونالدو ل هاري مجاوير ل جرين وود ل دي خيا ف برغم كل ده قدر تين هاج يحقق مركز تالت في الدوري  ف مع صفقات الفريق محتاجها زي مونت و كمان  هويلاند ممكن اليونايتد يفضل لأخر الموسم بينافس بس  بالنسبة ليا شايف أن الفريق لسه محتاج شوية شغل في الملعب و كمان شوية شغل في الدِكة بس نظراً لمستوي راشفورد الموسم اللي فات مع إضافة جودة للفريق ف ممكن مع ثبات التشكيل نقدر نشُوف اليوناتيد قادر ينافس بشكل مباشر ع مركز مؤهل للأبطال و ممكن مع ظرُوف غير عادية تحصل في الموسم نشوف اليونايتد بطل الدوري و إن كنت شايف أنه منطقيا و نظرياً شايف لسه كجودة اليونايتد بعيد عن أرسنال و السيتي بس خلينا نشُوف ،  المرشح التالي نيوكاسل إذا قدر ايدي هاو يدمج الصفقات الجديدة في الفريق بصُورة مثالية ف احنا بنتكلم عن بطل حقيقي جديد للدوري ، نيوكاسل عمل صفقات من تحت لتحت صفقات  سرقة كده متحسش أنه حد سمعله صُوت في الميركاتو راح بدري اشتري انضف حاجة في السُوق و روح علطُول ، عنده ميزة كمان أن الفريق معلوش ضغط زي الفرق التانية ، هو فريق ماشي خطوة خطوة و اتوقع أنه هيفنش مرتاح في التُوب فايف و هيزهق الفرق الكبيرة أوي في الماتشات الهيد تُو هيد  ، أنا عايز أرشح ليفربُول عشان مُو صلاح بس شايف أنه من غير ارتكاز حقيقي ليفربُول مش هيقدر يظهر الجودة الموجودة في الفريق ، عاملين زي ريال مدريد لما راح باع ماكليلي لتشلسي ف الفريق مكنش قادر يلعب ، نفس الحكاية هتدخل الدوري من غير ارتكاز ف ده معناه ماتش سكُور يكسبُوه و ماتشين يخسرُوه لكن إذا اشتروا ارتكاز حقيقي ف احنا بنتكلم ع فريق عنده جودة و عنده خبرة  و بنتكلم ع  مدرب محترم يقدر يدير الفريق ف إذا ده حصل و اشتروا ارتكاز عليه القيمة ف ده معناه أن في منافس حقيقي يقدر ينافس السيتي و ارسنال ، إذا ده محصلش مش حابب أقول الموسم اللي فات هيتكرر بس تقدر تقول أنه هيبقي أحسن منه حبتين تلاتة
تشلسي و توتنهام
تشلسي بيبني فريق ف انا مش مستني منه حاجة المُوسم ده يعني إذا حقق توب فايف هيبقي انجاز و خطوة ل أدام و اذا محققش ف أنا شايف أنه فريق في طُور النمو و ادامه  المُوسم ده عبال ما يتطور و العناصر  الجديدة تنسجم مع بعض ف شايف أن تشلسي بالنسبة ليا غير مرشح لتوب فايف  الموسم ده ، توتنهام توتنهام ده فريق عجيب أوي ، تبص ع الاسكواد بتاعه تحس أن الفريق تقيل أوي تشُوفه ف أرض الملعب تقُول مين دُول و ازاي بيلعبوا بالشكل ده ، هاري كين اللي كان جايب 90% من الأجوال الموسم اللي فات بتاعتهم مشي بس المدرب اللي معاهم يبدُو مدرب محترم و الجميل أن محدش متوقعله حاجة بس الاسكواد بتاعهم حلو و لحد دلوقتي مش معروف هيعملوا ايه ب ال 110 مليون اللي هياخدُوهم من البايرن ، ف إذا استثمروهم كُويس و كانوا موفقين ف مدرب كُويس أه جديد ع الدوري بس كُويس + اسكواد أنا شايف أسكواد كويس جدا جداً  مع استثمار كويس لفلوس كين  ف ممكن نشوف فريق جماعي كُويس يقدر يفرُك مع الفرق الكبيرة و ينافس بقوة ع التُوب فايف توقعاتي للمُوسم معلقة ع صفقة كاسيدُو إذا راح ليفربُول ، ليفربُول بطل الدوري إذا مراحش الدوري بين السيتي و أرسنال ، و السلام مِسك الخِتام .

المغرب تلامِس السحاب

 ديما مغرب ديما ، بصراحة أنا مِش عارف معني الجُملة اللي أنا كاتِبها دي بس بلاقي الناس كلها بتكتبها ع أساس أنهم فرحانين  ف حبيت أبدأ مقالي ب ديما مغرب ديما  ، المغرب في كأس العالم قبل مبارة فرنسا لم يدخل مرماها سوا هدف واحد و كمان أون جُول ، المغرب عانت طُول البطُولة من الإصابات و أهمها إصابة ساسي قلب الدفاع النابض لاعب ويلفرهمبتُون اللي عمل بطُولة بطُولية هو و رفاقه زياش و بوفال و الآخرون ف كان نعم القائد علي أرض الملعب  ، لن أطيل الحديث عن اللاعبين و لكن ما آثارني أكتب المقال ده الرُوح اللي كانت بتلعب بيها المغرب مش فكرة جرينتا و بتاع لا دي جرينتا ممزوجة بموهبة و نظام ، أنت ممكن يكون عندك رُوح بس مُؤهلاتك متخرجكش من باب البيت بس بتفضل تفرُك لحد ما تعمل حاجة و أحيانا  الروح بتديك شكل لكن الموهبة بتبلور الروح دي و تحطها في مكانها الصح ، المغرب و قبلها السعودية عملت كده ، بالمناسبة السعودية مكنتش محظُوظة زي ما يكون أخدت حظها كله أدام الارجنتين وينه ميسي وينه ، لكن المغرب برده كانت محظوظة بس برده  خلينا نقول أنه حظ مستحق أنك تكسب بلجيكا و تقدم جيم كبير عليها و تتعادل مع كرواتيا تاني العالم و تدي  كندا علي عنيها و تبقي أول  مجموعة زي دي ف دي حاجة محترمة أوي ،  ممكن الحظ موفقش معاها لما أسبانيا هي اللي بقت تاني بدل اليابان بس تقدر تقُول برده أن ألمانيا متأهلتش ف برده حظ المغرب كان حلو  ،  عملت جيم كبير ع أسبانيا و ودت الماتش لبلانتيات اللي لاعيبة أسبانيا تحس أنهم أول مرة يشُوفوا كورة بتحط ع نقطة الجزاء عشان يشُوطها لاعيبة صغيرة تكاد تكون عديمة الخبرة فكان فوز المغرب من وجهة نظري فوز مستحق ، و ماتش البرتغال ف حدث و لا حرج ، من وجهة نظري ماتش البرتغال ده ملحمة مغربية غير عادية ، أنا من الناس اللي معرُوف عنه أنه بيحب رُونالدو  بس اللي يتفرج ع الماتش لا يا جماعة المغرب كانت رهيبة ع أرض الملعب لدرجة أنك كنت ممكن تحس أن البرتغال هي اللي لابسة أحمر مش المغرب  ، ديما مغرب ديما

ليه مروحناش كأس العالم 2022

 مبدئياً عشان المدرب مش عارف هو عايز ايه أو مش عارف ياخد مين من اللاعيبة ، تعالي نشُوف  خط الدفاع كده  أخد عبد المنعم الونش ياسر إبراهيم محمود علاء يقوم الأول يتصاب و التاني ياخد إنذار  فيستدعي اتنين مدافعين من الدوري  ربيعة و علي جبر و خلي بالك أنت عندك أيمن أشرف كمان بيلعب مدافع ، أوكيه لحد هنا و الوضع طبيعي  ، يقوم يلعب بقي ربيعة طب و لما أنت من الأول مش مقتنع ب محمود علاء استدعيته ليه أصلا طب أوكيه لعبت ربيعة ليه لما هو أصلاً مش جاهز ما كنت تلعب علي جبر اللي هو نوعا ما أساسي في فريقه و نوعا ما بيلعب باستمرار و جايب فورمة و لاعب أفريقيا قبل كده و عنده خبرة  ، الموضوع بالنسبة ليا غريب جداً ومش فاهم أصلاً اختيارته  ، تعالي للنقطة التانية  أنا ممكن اتقبل فكرة أنك تلعب مصطفي محمد و يبقي المهاجم الأساسي بتاعك ع أساس النوَش اللي بيعمله مصطفي محمد مع المدافعين و أنه قوي بدنياً و بينزل يستلم و يبدأ الهجمة لأنك بتلعبله الكور الطويلة ، مين أنت بقي عندك ف المنتخب بيلعب كُور طويلة أصلاً صح ، 90% من باصات الشناوي الطويلة بتبقي أوت ، معندكش حتي بيوزع كُور طويلة صح أصلاً و اللي بيوصل بيتقطع من مصطفي محمد  ، أنت متخيل أن خطتك كلها قايمة ع الموضوع ده ، يا أخي ده أنت واخد مروان برده عشان طويل و عشان مصطفي محمد لو اتصاب مروان هيعمل الدور ده ، طب ما أنت عندك شريف  ممكن ميكونش بيقوم بالدور ده ع أكمل وجه بس ع الأقل هداف ، ده أنا آخر مرة شوفت مصطفي محمد بيسجل فيها لما شتم حسام البدري و تف عليه " بالمناسبة اللقطة دي كانت المفرُوض متمُرش مرُور الكرام و اللاعب ده مكنش المفرُوض ينضم للمنتخب تاني ، مفيش حاجة اسمها فُرصة تانية مع لاعب قل أدبه ع المدرب بتاعه و أدام 100 مليون  ، وجهة نظري طُول ما مصطفي محمد بيلعب مع المنتخب مش هنشُوف خير و لا هو هيشُوف خير مع المنتخب  ، لأنه متعاقبش أصلاً ، ده الولا مش سالك بجنيه ده كان مخلي  واحد يرُوح يمتحنله ، طب أنت ربنا هيوفقك ازاي و أنت أصلاً  لا اتعاقبت و لا حتي طلعت اعتذرت  ، أنت كمنتخب لازم تهتم بسلوك اللاعيبة بتاعتك ،  المفرُوض ف كأس افريقيا و بعد ثبوت واقعة الغش علي مصطفي محمد ، كان المفرُوض اللاعب حرفياً يتسرح من المنتخب ، هتقولي هتخسر مهاجم و بتاع أقُولك طب مهو لعب عمل ايه ، طب هاتلي ماتش كان مُؤثر فيه تأثير كبير ، ممم مفيش متدورش ، كان ممكن يرجع تاني بعد الموضوع ما يتم معالجته وبعد ما الولا نفسه يتم تأهيله نفسياً و أخلاقياً تاني بعد الواقعتين اللي فاتوا فِكرة ضمه  بعد الواقعة الأولي و عدم تسريحه بعد الواقعة التانية لأ و ضمُه تاني فكرة غريبة أنا مِش  قادر اقتنع بيها ، كلنا بنغلط و كلنا بشر بس أما  تحصل حاجة غلط لازم يبقي في عقاب و لازم يبقي عقاب  قوي عشان حتي غيره من اللاعيبة ميتأثرش و ميعملش كده  و يفكر ألف مرة قبل ما يغلط  لأن أنت كمان كلاعيب كورة ف أنت شخص مشهور و قدوة لغيرك أنا بس مش عايز أخرج بره الموضوع في المجمل ، الفكرة في لاعب زي شريف أنه عارف طريق الشبكة و ممكن يديلك أوبشن كتير لما تحتاجه في ماتش زي ده و تبقي محتاج تضغط عشان تسجل ، يعني تعالي نفترض أن السنغال سجلت التاني ، طب ما أنت ف الحالة دي المفرُوض أنك هتهاجم طب هتهاجم ازاي و أنت معندكش حد يسجل معندكش حد ف المنطقة ، أنت أصلاً ملكش شكل هجومي  ف لازم مهاجم صندوق يلعب و ف الحالة دي كان المفرُوض تضم شريف لعل و عسي يعمل حاجة لما تحتاجه ،  تعالي بقي نمسك في اختيار الباك اليمين شوية و نقطع فيه عمر جابر  لم يتم ضمه في كأس العرب ، لم يتم ضمه في كأس أفريقيا " تم ضمه ف ماتشين كأس العالم عشان يلعب ع مين ، ع ساديو ماني ،  عمر جابر مش طويل ، مش قوي بدنياً تكاد تكون مش شايفه من ضعف بنيته الجسمانية و ده مش تنمر  دي مقومات لاعب أنت ممكن تبقي محتاجه في وقت ما ممكن تبقي  تلعبه وينج أدام الباك اليمين و هيكون مفيد شوية و هتعرف تستفاد من نزعته الهجومية ، لكن تلعبه علي ساديو ماني راس راس يبقي أنت يا معلم بتنتحر ، عمر كمال لعبته طول كأس افريقيا و الولا نوعاً ما أدي مش بشكل كويس جداً بس ع الأقل  قوي بدنيا و بيلتحم و ف ماتش زي ده أنت محتاج حد يلتحم بدنياً  ، أنت قررت تلعب عمر جابر ف ماتش الذهاب عشان تستفاد  من نزعته الهجومية  و دي فكرة قد تبدو كويسة لو ملعبش الماتش التاني أو لو لعب لحد الدقيقة 60 مثلاً ف الماتش الأول  ، لكن المفاجأة أنه لعب الماتش التاني ، و لولا أنه اتصاب كان كمل و شيلنا تلات أربعة أهداف من ناحيته بس ، الولا معذُور ، مش ماتشه خالص لا الذهاب و لا العودة  ، الغريب بقي أن ف الماتش الأول ماني كان واخده رايح جاي أنا أكاد أجزم أن ماني مكنش شايفه خالص و لولا ستر ربنا ماني كان بيوصل الجول و تحس أنه سِرح مش عارف يعمل ايه ف الكورة ، ف الماتش خلص 1/0  ، المفرُوض بقي أنت رايح هناك عشان تدافع ف الطبيعي بقي أنك مش هتبدأ ب عمر جابر و المهازل اللي شُوفتها ف ماتش الذهاب ، و أنت الماتش ده هتنزل مضغوط أكتر من ماتش الذهاب أكيد كيروش هيلعب امام عاشور اللي أدي كويس جداً ف نهائي أفريقيا ، لا لا هيلعب عمر كمال اللي لعب أفريقيا كلها و ملعبش النهائي عشان خاطر الإنذار ، ممم لعب عمر جابر مفاجأة مش كده  ، الولا اتصاب من أول قلم ، عمل فاول كلف الفريق جول و اتصاب ، ايه الفكرة بقي أنك تضم لاعب زي عمر جابر مضمش للمنتخب بقاله مدة و أنت نفسك مستدعتوش قبل كده  ، طب ما انت لو عايز تلعب هجومي ليه مستدعتش محمد هاني ، هاني مش أحسن حاجة بس هاني ف كل الماتشات الكبيرة بيلعب كويس و بيهاجم و بيروح و بيجي  ف لما أنت عايز تطير الباكات ليه مستدعتش محمد هاني ب ، أكيد أي حد أحسن من عمر جابر   موضوع ضم عمر جابر  و لعبه الماتشين حاجة غريبة بالنسبة ليه و مش مفهومة ، تعالي بقي نشوف تغير كيروش بعد ما اتصاب عبد المنعم نزل مين نزل أيمن أشرف أقصر مدافع موجود  ف التلاتة اللي ع الدكة ، طب لما أنت شايف يا ملعم  أن أيمن أشرف أحسن مدافع فيهم ، ليه مبدأتش بيه أصلاً و هو أجهز من ربيعة ،  اه عشان قصير ، طيب يعني هو طِول ف الربع ساعة اللي نزل فيهم ربيعة ، قد تكون الفكرة الأقرب للموضوع ده هو دور علي الانسجام بين التنين المدافعين أكتر ما دور علي  قدرات ، و بصراحة الفكرة قد تبدو واقعية في حالة أنك طول  بطولة أفريقيا كل ماتش كنت بتنزل ب اتنين مدافعين شكل لحد ما صفصفت علي عبد القادر و الونش ، يعني ف كل الأحوال أنت  كنت محتاج تلعب اللاعب اللي جاهز و المناسب أكتر من موضوع الانسجام ده و ده برده من الحاجات الغريبة ،  تعالي نشُوف بقي أفشة ، أنت مش مقرر أنك تغير الخطة و تلعب أفشة ضميته ليه بقي  و أنت أصلاً معندكش نية تنزله ، فكرة ضم أفشة بالنسبة ليا هتبقي واقعية لو لعب الماتش الأول و ريح الماتش التاني بما انك ع أرضك و المفرُوض أنك هتهاجم يعني ف أنت محتاج لاعب يوصل الكورة للمهاجمين - اه صح أنت معندكش مهاجمين و بتلعب كور طويلة و خلاص ف الأوت -  ف كان الموضوع هيبقي منطقي لو بدأ ب السولية و حمدي فتحي أو النني و ادامهم أفشة ، طب ده حتي ف ماتش العودة كان ممكن برده أفشة يبقي ليه دور طالما انت  هتلعب صلاح مهاجم ف كان هيبقي طبيعي لو لعبت ب أفشة بدل مرموش ع الأقل يبقي ف ربط بين الدفاع و الهجوم أو تلاقي حد يمسك كورة في نص الملعب بتاعك بدل ما أنت ملكش شكل كده و عمال تشلِت و خلاص و يا تري الكورة هتنزل لمين  ، بالنسبة ليا فكرة أنك تلعب ع أنك توصل بلانتيات دي فكرة مريبة جداً ، يا جماعة أنا  لعبت بشرف و خرجت بلانتيات ، بس أنت ملعبتش يا معلم أنت كنت بتضيع وقت  ! ف أفريقيا كنت متعاطف مع المنتخب عشان الفريق كان بيحاول و فقد عناصر كتير من اللاعيبة ف الإصابات لكن أنت ايه حجتك ف ماتشين السنغال دول ،  أنت معندكش لاعب ف الأسكواد بيعرف يرقص ، طب ما أنت عندك عبد القادر اللهم صلي علي النبي بينور في الأهلي ، لاعب زي ده أنت كنت محتاجه يمكن يجبلك بنالتي و لا يتسبب في طرد في ماتش كبير زي ده لكن أنت فضلت تبان باهت في ماتش الذهاب و فضلت متلعبش كورة و تدافع طول ماتش الإياب و كل ده عشان لما تخرج تبقي خرجت بنالتيات  ، أنا خسرت بنالتيات يا جماعة ، احنا ملناش ذنب ده توفيق و عدم توفيق ، طب أنت عملت اللي عليك ، أنت لعب كُورة في الماتشين ، أنت ضميت حتي لاعيبة كورة في الماتشين ، اهتميت بسلوكيات لاعيبة كاتحاد كورة بره الفريق الإجابات كلها لا ،  طب عايز تصعد ازاي كأس عالم أو تاخد بطُولة كبيرة و أنت عملت كل حاجة غلط
من أول سلوك اللاعيبة بره الملعب لحد  القائمة للتشكيل لطريقة اللعب اللي محدش عارفها لحد دلوقتي 
عموماً الحمد لله ، و ربنا يعوضنا خير ...

مبارة القرن

مبدئياً و قبل الدخول في تفاصيل المبارة ، نتمني التوفيق لكلا الفريقين و السلامة للمصابين بيفرُوس كرُونا و غيرهم ،  مباريات الأهلي و الزمالك مبيفرقش معاها فارق الجودة أوي بين الفرقتين لما بيكُونوا مُستوي الفرقتين قُريب من بعض ، بيفرق لما يكُون فارق الجودة كبير بين الفريقين زي جيل أبو تريكة و بركات كان فارق الجودة واضح للعيان فكان الأهلي بيدخل الماتش كسبان من قبل ما يلعب  و  تتحكم  مدي صعوبة المبارة علي الأهلي بالتوفيق و نشاط اللاعيبة  ، لكن المُستوي الحالي بين الفريقين قد يكُون مُتقارب مع أفضلية لبعض المراكز  لفريق عن الآخر لكن بالمجمل العام متقدرش تقُول أن في فريق أعلي جودة من الفريق التاني فالأهلي بطل الدوري و لم يخسر طُول المُوسم سوي من الزمالك و الزمالك بطل الكُونفدرالية و ثاني الدوري و هو الفريق الوحيد الذي استطاع أن يهزم الأهلي في الدوري دون النظر إلي فارق النقاط الشاسع بين الفريقين في الدوري و الذي لا يكشف حقيقة تقارب مستوي الفريقين ، في مُباريات القمة عادة من يربح من يكُون أهدي أعصاباً في الفريقين ،  فكلما كان الفريق هادئ في الملعب – بارد – كُلما كان أقرب إلي الفوز من الفريق المُندفع  ، ففي مُباريات الأهلي و الزمالك من يُحافظ علي رباطة جأشه و يستقبل لعب دُون اندفاع أو استنزاف مجهود بدني ضخم من الفريق  في بداية المُبارة هو الذي يربح في النهاية و خاصة إذا لم ينتج الاندفاع البدني لهذا الفريق عن هدف فحينئذ تنقلب المُبارة و تذهب للفريق الأهدي و الأكثر تماسكاً  ، فالأهلي في مبارته الأخيرة في الدوري كان الأكثر اندفاعاً في الشوط الأول و لكن الزمالك كان الأكثر هدُوءً  انذاك  فذهبت المُبارة في النهاية إلي الزمالك بثُلاثية نظيفة و عن استحقاق من وجهة نظري ، و في ديربيات الأهلي و الزمالك – جيل أبو تريكة – كان دائما الزمالك هو الأكثر اندفاعاً في الشُوط الأول لمحاولة اثبات شئ امام هذا الجيل و لكن سُرعان ما كان يتحول هذا الاندفاع إلي هزيمة فالأهلي كان الأكثر استقراراً و أكثر برُوداً و كان يعلم جيداً أنه مهما خسر الكُورة أو استقبل أهداف كان علي يقين أنه عائد إلي المبُارة لا محالة و هذا هو فارق الجودة الواضح في هذا الجيل للأهلي ،  أما الآن فيتبادل الفريقين القوة في مختلف المراكز ف  الزمالك هو الأقوي دفاعياً  بقيادة محمود علاء و الونش الذي سيغيب عن المُبارة و حتماً  سيترُك غيابه تأثيراً كبير  و يتميز خط وسطه بالتنوع و الإبداع و المجهود حيث ساسي و زيزُو و  طارق حامد  و في الأمام نجد اللاعب الأكثر رُعباً للجماهير الحمراء و هو بن شرقي دون نسيان مُصطفي محمد صاحب الهدف الأكثر من رائع في الديربي الأخير  ، أما الأهلي فتكمن نِقاط قوته في حراسة المرمي فالشناوي يعد أفضل حارس جاء مصر بعد فترة عصام الحضري   و خط وسطه و لا ننسي غياب الدبابة البشرية ديانج و الذي حتماً  بغيابه سيترك فراغ لا بأس بيه  و علي معلُول و الذي أخيراً يدخل المُبارة النهائية و هو غير مُصاب  وأجاي ، الأهلي تكمن نقاط قوته في جماعيته ، الزمالك يدخل المُبارة أملاً في السادسة بعد إخفاق صن داونز و الأهلي يدخل النهائي أملاً في التاسعة بعد إخفاقات عديدة الوداد ، الترجي  و اضرب يا بدري ليليااه الشهيرة ،  لا ننسي أن كلا الفريقين  يمتلك مدرب لم يمضِ علي إدارته للفريق أكثر من شهرين  و باتشيكو و من نفس مدرسة باتريس كالتيرون و لو كان كالتيرون هو المدرب حتي الآن لكان نسبة فوز الزمالك بالمبارة تتخطي ال65% و لكن تخلي كالتيرون عن الفريق ، أما المدرب السويسري فقد تخلي أيضاً عن الأهلي بعد ضمان الدوري و هي بطُولة  الأهلي المفضلة دوماً ، باتشيكو مدرب دفاعي بحت أما موسيماني مدرب من مدرسة الكورة المتوازنة ، حتي الآن لا تستطيع أن تقُول أن هناك لمسة حقيقة لكلا المدربين علي الفريقين لكن كل منهما له مدرسته الخاصة ، في لقاءات كهذه من يستغل فترات تحكمه في المبارة هو من تكون له القبضة الأعلي في المبارة  ، يا تري محفظتك فيها ايه يا باتشيكو يا تري محفظتك فيها ايه يا مُوسيماني ...

الدوري و دوري الأبطال

الدوري اصعب من دوري الابطال  ، الفريق الاقوي  و صاحب النفس الطويل  هو اللي بيكسب الدوري  ، ممكن تكسب الدوري حظ  لو الفرق كان نقطة مثلا و هي اللي حسمت الدوري او تحكيم  بكورة عطت التلت نقط لفريق و اتحسم بيه الدوري بس برده في الغالب بتكون تستحق و تحس ان الفريق اللي اخد الدوري تعب فعلا و بذل مجهود كبير و الإسكواد بتاعه متنوع فعلا و عنده حُلول  أو حلوله قُليلة بس إصاباته أأقل و جاهز بدنياً  للموسم كُله ، يعني الدوري دايما بياخده الفريق الاقوي في الدولة  لكن دوري الابطال ممكن تكون أسوأ نسخة ليك و تاخد البطولة زي تشلسي  مثلا  لما اخد البطولة  ٢٠١٢ و زي الريال في اول سنة لزيدان ، مش شرط يكون اسكوادك  هو التوب  مش شرط يكون  فريقك  كامل و فيه إصابات كتير  مش شرط تكون اقوي هجوم  و اقوي دفاع   تشلسي ٢٠١٢   ، اياكس ٢٠١٨ - اي نعم هي اكيد عوامل مساعدة بس مش العامل الأكبر - مش شرط تكون فريق مرشح او غير مرشح  عادي جدا ممكن تكون مش مرشح و مضروب بالجزمة في بلدك و خسران الذهاب ع ارضك و تطلع باريس سان جيرمان عادي جدا  ، أوقات كتير بتفرق كورة في العارضة زي ماتش الريال و درتموند ، ماتش الريال و اليوفي  او رعونة مهاجم زي كورة ديمبلي في ماتش ليفربول او ضربة جزاء مش محسوبة  زي ماتش  الريال بايرن  لمسة يد مارسيلو او ماتش برشلونة و باريس الريمونتدا  أو ماتش تشلسي و برشلونة  - غدارة غدارة - او طرد غير مستحق  زي طرد فان بيرسي امام برشلونة  ، طرد ناني أمام ريال مدريد ، أو إصابة لاعب زي إصابة مودريتش ف السنة التانية لأنشلوتي مع الريال  ، زي إصابة صلاح في النهائي 2018 ،  هجمة واحدة كفيلة تنقلك من  بطل دوري الابطال لليوروبا ليج زي ما حصل مع نابولي و ليفربول 2019  في الغالب الحظ و التحكيم ممكن يأثروا بصورة كبيرة في تحديد هوية البطل و بنقول التحكيم الغير متعمد عشان نظرية المؤامرة عشان كده دوري الابطال ملوش معايير، دوري الابطال عايز الفريق الفائق المصحح اللي بيستغل  أنصاف الفرص  اللي بيعرف يفوق في الماتشات الكبيرة مهما كانت حالته ، مفيش كتالوج لدوري الابطال ، مفيش سيستم معين تحطه ف تاخد دوري الابطال في الآخر ،  لا عادي جدا ممكن يبقي معاك نجوم العالم  و فورمة  و تيجي روما تطلعك عادي جدا – مانولاس-  ، مفيش فريق مرشح - ممكن تكون توب لحد شهر اتنين و بعد كده تاخد بالجزمة من طوب الأرض ، مُمكن تعمل ريمونتدا مُستحيلة في الأدوار الإقصائية و في الآخر تخرج الدُور اللي بعدُه ، مهما كانت حالتك كرب انت مرشح طول ما أنت لسه  في البطولة ،  دوري الابطال من احلي الحاجات في الدنيا .

قواعد ثابتة في مواجهة أتليتكو في دوري الأبطال

 أتليتكو مدريد هو الفريق الوحيد في العالم اللي قادر يخلي افضل فريق في العالم عامل زي السكة  الحديد مع احترامنا للسكة الحديد 
 في ماتش اتليتكو مدريد ان عاجلا او آجلا هتجيلك فُرص و انت و شطارتك بقي يا تستغلها يا طريق السلامة انت
 اتليتكو مدريد علي ارضه بيضحي بدنيًا بيلعب دفاع و هجوم لحد الدقيقة ٧٠ او لحد ما يجيب جول و بعد كده بيكسكس وراه و يلعب ع المرتدة اللي مبتحصلش غير كل فين و فين
 اتليتكو مدريد بيستنزفك بدنيا و ذهنيا ، في الغالب الماتش اللي بعده خصمه بيُقع لو معندوش دكة كويسة
 اوعي تخلي اتليتكو يسجل ، الشراسة بتزيد
  في الغالب اتليتكو بعد ما بيعمل كل ده بيخرج برده من البطولة دايما بتبقي الخطة دي ناقصة حاجة في ماتش العودة و بيبقي الرهان عن سيميوني كُل سِنة أنه ازاي يحافظ علي الحالة الذهنية للفريق في ماتش العودة
 الخصم بيطلع من ماتش اتليتكو مدريد كاره الكورة و اللي بيلعبوها
* اتليتكو مدريد عامل زي الثانوية العامة في شهر فبراير ، لا انت مذاكر كويس ف عايز تمتحن دلوقتي و تخلص و لا انت عارف تمتحن دلوقتي و تخلص عشان لسه في شهر فبراير

أتليتكو مدريد مش من مدرسة الكُورة الحلوة أتليتكو مدريد من مدرسة أزاي يخرجك من الماتش و يخليك تغلط بيلعب علي الحالة الذهنية و البدنية 

أتليتكو مدريد لما بيدخل الماتش و هو محتاج يكسب غير لما بيدخل الماتش محتاج يدافع الموضوع بيقلب معاهم عكسي و أتوقع أن سيميوني هيهاجم في أنفيلد